उत्तर कोरियाले शनिबार पूर्वी सागरतर्फ लगभग १० वटा ब्यालिस्टिक क्षेप्यास्त्र (मिसाइल) प्रहार गरेको दक्षिण कोरियाको योनहाप एजेन्सीले दाबी गरेको छ। 

दक्षिण कोरिया र अमेरिकाबिच संयुक्त सैन्य अभ्यास भइरहेका बेला यो प्रक्षेपण गरिएको हो। 

दक्षिण कोरियाका ज्वइन्ट चिफ्स अफ स्टाफ (जेसीएस) का अनुसार स्थानीय समय शनिबार दिउँसो १:२० बजे उत्तर कोरियाको सुनान क्षेत्रबाट क्षेप्यास्त्र प्रहार गरिएको हो। 

यो यस वर्ष उत्तर कोरियाको तेस्रो ब्यालिस्टिक क्षेप्यास्त्र परीक्षण हो।

यसअघि जापानको रक्षा मन्त्रालयले पनि उत्तर कोरियाबाट क्षेप्यास्त्र प्रक्षेपण गरिएको पुष्टि गरेको छ। 

मन्त्रालयले आफ्नो आधिकारिक एक्स अकाउन्टमा भनेको छ, ‘सम्भवत: ब्यालिस्टिक मिसाइल उत्तर कोरियाबाट प्रहार गरिएको हुन सक्छ।’

यस विषयमा उत्तर कोरियाबाट अहिलेसम्म कुनै प्रतिक्रिया आएको छैन।