पश्चिम एसियामा जारी तनावबीच संयुक्त अरब इमिरेट्सले आक्रमणलाई रोक्दै गरेको वायु रक्षा प्रणालीको भिडियो सार्वजनिक गर्ने १० जनालाई पक्राउ गर्न आदेश दिएको छ । राज्य सञ्चारमाध्यमका अनुसार उनीहरूले आक्रमणका वास्तविक दृश्यका साथै विस्फोट र आक्रमण देखाइने एआईबाट बनाइएका नक्कली भिडियो र तस्वीरहरू पनि सामाजिक सञ्जालमा पोस्ट गरेका थिए ।

अधिकारीहरूले ती व्यक्तिहरूलाई छिटो न्यायिक प्रक्रियाका लागि अदालतमा पठाइएको बताएका छन् ।

यसैबीच आबुधाबी प्रहरीले देशमाथि भएको आक्रमणका बेला भिडियो खिचेर भ्रामक सूचना फैलाएको आरोपमा विभिन्न देशका ४५ जनालाई पक्राउ गरेको जनाएको छ ।

गत हप्ता दुबईमा इरानी मिसाइल आकाशमा उडेको दृश्य खिचेको आरोपमा ६० वर्षका एक बेलायती नागरिकलाई यूएईको साइबर अपराध कानुनअन्तर्गत मुद्दा दायर गरिएको थियो ।

राधा स्टर्लिङका अनुसार हालसम्म हालैका मिसाइल आक्रमणसम्बन्धी भिडियो र सामाजिक सञ्जाल पोस्टका कारण यूएईको साइबर अपराध कानुनअन्तर्गत २१ जनाविरुद्ध मुद्दा दायर गरिएको छ ।

सामाजिक सञ्जालमा भने आवासीय अग्लो भवन, लक्जरी होटल र दुबई विमानस्थलनजिक मिसाइलका टुक्रा खसेका तस्वीरहरू व्यापक रूपमा फैलिएका छन् ।