१२ फागुन, काठमाडौं । मंगलबार साँझ अष्ट्रेलियाली प्रधानमन्त्री एन्थोनी अल्बानीजलाई उनको क्यानबेरास्थित सरकारी निवास ‘द लज’ बाट धम्की आएपछि सुरक्षित स्थानमा सारिएको छ ।

अनुसन्धानकर्ताहरूका अनुसार यो सुरक्षा खतरा चीनमा प्रतिबन्धित एक सांस्कृतिक समूहसँग सम्बन्धित इमेलबाट सुरु भएको थियो ।

‘शेन युन’ नामको चिनियाँ नृत्य र संगीत समूहका कलाकारहरूलाई पठाइएको उक्त चिनियाँ भाषाको इमेलमा उनीहरूको अष्ट्रेलियाली प्रदर्शनी रद्द नगरे प्रधानमन्त्रीको निवासमा विष्फोट गराउने र ‘रगतको खोला बगाउने’ चेतावनी दिइएको थियो ।

अष्ट्रेलियाली संघीय प्रहरीले स्थानीय समय अनुसार बेलुका ६ बजे उक्त निवासमा खोजतलास सुरु गरेको थियो ।

करिब तीन घण्टाको गहन अनुसन्धानपछि कुनै पनि शंकास्पद वस्तु फेला नपरेको पुष्टि गरेको छ ।

घटनापछि प्रधानमन्त्री अल्बानीजले सामाजिक सञ्जालमार्फत आफ्नो कुकुर ‘टोटो’ को तस्वीर साझा गर्दै आफू सुरक्षित रहेको र प्रहरीको व्यावसायिकताका लागि धन्यवाद व्यक्त गरेका छन् ।

अधिकारीहरूले यस घटनालाई अत्यन्तै चिन्ताजनक र असामान्य भनेका छन्, जसले राजनीतिक व्यक्तित्वहरूमाथि बढ्दै गएको सुरक्षा चुनौतीलाई संकेत गर्दछ ।