काठमाडौँ — अमेरिकी राष्ट्रपति डोनाल्ड ट्रम्पले आफ्नो कार्यकालमा अपराध नियन्त्रण भएको र अर्थतन्त्रमा सुधार आएको बताएका छन् । दोस्रो कार्यकाल निर्वाचित भएपछि पहिलोपटक संयुक्त सदन (कंग्रेस) लाई सम्बोधन गर्दै उनले यस्तो दाबी गरेका हुन् ।

उनले झन्डै १ घण्टा ५० मिनेट लामो सम्बोधन गरे । अमेरिकी राष्ट्रपतिले कंग्रेसमा यति लामो सम्बोधन गरेको यो पहिलोपटक हो । उनले मिनेसोटामा बस्ने सोमाली अमेरिकीहरूलाई समुद्री डाकू भने । त्यस्तै अवैध आप्रवासीहरुका कारण अमेरिकामा अपराध बढेको दाबी गरे । गत साता सर्वोच्च अदालतले भन्सार शुल्क बढाउने ट्रम्पको कदममा रोक लगाएपछि उनले भन्सार शुल्क वृद्धिका लागि नयाँ कानुनको साहारा खोजिरहेका छन् ।

अमेरिकाले स्वतन्त्रतापछिका २ सय ५० वर्षमा धेरै प्रगति गरेको र आफ्नो कार्यकालमा अमेरिका अझै सुदृढ र बलियो बन्ने आशा उनले व्यक्त गरे । उनले अमेरिकासँग विश्वकै शक्तिशाली सेना रहेको बताए ।

उनले ईरानमा कुटनीतिक माध्यमबाट लक्ष्य हासिल गरिने बताए । तर,  आणविक कार्यक्रम सञ्चालन नगर्न ईरानलाई चेतावनी पनि दिए । 

'१७७६ मा सुरु भएको क्रान्ति समाप्त भएको छैन । यो अझै पनि जारी छ, किनकि स्वतन्त्रता र स्वतन्त्रताको ज्वाला अझै पनि प्रत्येक अमेरिकी देशभक्तको हृदयमा बलिरहेको छ,’ ट्रम्पले भने, ‘र हाम्रो भविष्य पहिलेभन्दा विशाल, राम्रो, उज्यालो, साहसी र अझ गौरवशाली हुनेछ,' उनले भने ।