गाउँ पर्यटन प्रवर्द्धन मञ्च नेपाल (भिटोफ नेपाल) का महासचिव अजीव भट्टले नेपाल सरकारले हालै सार्वजनिक गरेको नीति तथा कार्यक्रममा ग्रामीण पर्यटन, होमस्टे प्रवर्द्धन तथा पर्यटन ब्रान्डिङलाई विशेष प्राथमिकता दिएको बताएका छन्। नेपाल टेलिभिजनको कार्यक्रम ‘गन्तव्य नेपाल’ मा बोल्दै उनले सरकारले ५ हजार होमस्टेलाई “नेपाल होमस्टे ब्रान्ड” अन्तर्गत दर्ता तथा ब्रान्डिङ गरी अनलाइन बुकिङ प्रणालीमार्फत सञ्चालन गर्ने योजना सकारात्मक भएको उल्लेख गरे। तर, यस्ता योजना प्रभावकारी कार्यान्वयनमा निर्भर रहने उनको भनाइ थियो।

 उनले भिटोफ नेपालले पर्यटन मन्त्रालय, नेपाल पर्यटन बोर्ड तथा तीनै तहका सरकारसँग सहकार्य गर्दै ग्रामीण पर्यटन विकासमा काम गरिरहेको जानकारी दिए। हालसम्म संस्थाले ३२ वटा नमुना पर्यटकीय गाउँ घोषणा गरिसकेको भन्दै चित्लाङ र सिरुबारीजस्ता गन्तव्य सफल ग्रामीण पर्यटनको उदाहरण बनेको बताए। भट्टले ग्रामीण पर्यटनमा जनचेतनाको कमी, बजारिकरणको अभाव तथा पर्यटक सेवा व्यवस्थापन चुनौतीका रूपमा रहेको उल्लेख गरे।

उनले होमस्टे र होटल फरक अवधारणा भएको स्पष्ट पार्दै होमस्टेले स्थानीय संस्कृति, रैथाने खाना, जीवनशैली र मौलिक अनुभव प्रवर्द्धन गर्नुपर्ने धारणा राखे। साथै, नेपाललाई “देवभूमि” का रूपमा धार्मिक तथा आध्यात्मिक पर्यटनको केन्द्र बनाउन सकिने भन्दै पशुपतिनाथ, लुम्बिनी र मुक्तिनाथजस्ता गन्तव्यको प्रभावकारी प्रचार आवश्यक रहेको बताए। आगामी “नेपाल भ्रमण वर्ष २०८५” लाई लक्षित गर्दै नयाँ ग्रामीण गन्तव्य पहिचान, स्थानीय संस्कृति संरक्षण तथा रैथाने खानाको ब्रान्डिङमा भिटोफ नेपालले थप सक्रिय भूमिका खेल्ने उनले जानकारी दिए।