धादिङ : नागढुंगा–नौबिसे सडक खण्ड अन्तर्गत निर्माण भइरहेको सडक स्तरोन्नतिको काम अन्तिम चरणमा पुगेको छ । आयोजनाका अनुसार हालसम्म करिब ८५ प्रतिशत काम सम्पन्न भइसकेको छ ।

यसैबीच उक्त सडक खण्डमा अन्तिम ब्ल्याकटपिङ (कालोपत्रे) गर्ने काम सुरु गरिएको छ । धादिङको खानीखोला क्षेत्र आसपास अन्तिम चरणको कालोपत्रे भइरहेको दृश्य देख्न सकिन्छ । नौबिसे–नागढुंगा सडकखण्ड आयोजनाका प्रमुख केशवप्रसाद ओझाका अनुसार पहिलो प्याकेजअन्तर्गत १२.५ किलोमिटर सडक र दुई वटा पुल निर्माण गर्नुपर्ने योजना रहेको थियो । सोहीअनुसार सडक विस्तार, कालोपत्रे, ढल निकास तथा अन्य संरचना निर्माणका अधिकांश काम सम्पन्न भइसकेको उनले बताए । 

हाल केही बाँकी कामहरू अन्तिम चरणमा अघि बढिरहेको आयोजनाले जनाएको छ । निर्माण कार्य पूर्ण रूपमा सम्पन्न भएपछि धादिङ र काठमाडौंबीचको यात्रा समय घट्ने तथा सडक सुरक्षामा समेत सुधार आउने अपेक्षा गरिएको छ । सडक स्तरोन्नति अन्तिम चरणमा पुगेकाले छिट्टै काठमाडौं–धादिङ आवतजावत अझ सहज र सुरक्षित हुने विश्वास गरिएको छ ।