नेपाल राष्ट्र बैंकका गभर्नर विश्व पौडेल घुमघाममा व्यस्त छन् । गत साता मोरङको रंगेली पुगेका उनी आज सुर्खेतबाट सल्यान जाने क्रममा राउटे बस्तीमा पुगेर फोटो खिचाए ।

रंगेलीमा नक्कली नोटको पहिचान बताउन पुगेका उनी प्रायः मध्य पहाडी लोकमार्ग हुँदै पूर्व पश्चिमका जिल्लातिर पुगिरहन्छन् । बैंकको कार्यक्रममा विदेश भ्रमण पनि उनको व्यस्तताभित्र पर्ने गरेको छ । अघिल्लो महिना श्रीमती र सानी छोरीसहित साताव्यापी बिदा मनाउन दुबई पुगेका थिए । 

बैंकका दुबै जना डेपुटी गभर्नरको पाँच वर्षे कार्यकाल फागुन २४ गते सकिँदैछ । पौडेल जेठमा गभर्नर नियुक्त भएपछि आफूसँगै डेपुटी गभर्नरहरुको विदेश भ्रमणले रेकर्ड ब्रेक गरेको पछाडि पारिएका भनिएका कार्यकारी र निर्देशकहरुको निचोड छ । 

सरकारले छ महिनाअघि घोषणा गरेको चुनाव मितिलाई गभर्नर र डेपुटीहरुले बेवास्ता गरेका कारण मंसिरमै हुनुपर्ने कतिपय कर्मचारीको बढुवा कम्तीमा पाँच महिना पछाडि धकेलिएको छ । बेलैमा निर्देशकमा बढुवा हुनबाट वञ्चित एकजना उपनिर्देशकले जनआस्थासँग भने, ‘गभर्नरलाई कर्मचारीको बढुवा,सरुवाको चुरो कुरो नै थाहा छैन जस्तो लाग्यो । चुनाव घोषणापछि डेपुटीहरुझैँ गभर्नर पनि विदेश भ्रमणमा व्यस्त भएपछि आचारसंहिता अगावै गर्नुपर्ने प्रशासनिक निर्णयको बिजोग भयो ।’

यसबीच सहायक निर्देशकबाट उपनिर्देशकमा गरिने आन्तरिक मूल्यांकन बढुवामा २०५३ सालमा सेवा प्रवेश गरेका सहायक र नगद सहायकलाई बढुवा नगर्ने उद्देश्यले पनि यो प्रक्रियालाई पछाडि धकेलेको एकथरीको दावी छ । भन्छन् ‘गभर्नर पौडेल निकटस्थहरुले उनको हवाला दिँदै पुरानालाई बढुवा नगरिने भनी गरेको हल्लाले बैंकको कार्यवातावरण बिथोलेको छ ।’

माघ पहिलो सातादेखि फागुन २१ गतेसम्म निर्वाचन आचारसंहिता लागेकाले निजामतीमा झैँ केन्द्रीय बैंकका कर्मचारीको सेवा,सुविधा निर्णय सबै रोकिएको छ । २५ गते बिहान मन्त्रिपरिषदबाट डेपुटीहरु नियुक्त हुन नसकेको अवस्थामा त्यसपछि तत्काल कुनै पनि निर्णय हुन सक्ने अवस्था छैन ।