काठमाडौ । राष्ट्रिय प्रजातन्त्र पार्टी नेपालका अध्यक्ष कमल थापाले जेनजी आन्दोलनको दोस्रो दिन प्रमुख दलका प्रमुख नेताहरूले आफूलाई सम्पर्क गरी देश संकटमा परेको भन्दै पूर्व राजा ज्ञानेन्द्र शाहलाई ल्याउन पहल गरिदिन आग्रह गरेको खुलासा गरेका छन् । बुधवार एभिन्यूज खबरको लोकप्रिय कार्यक्रम ‘कता जाँदैछ देश’ मा प्रस्तोता सुशील पाण्डेसँगको कुराकानीमा अध्यक्ष थापाले देश भयावह अवस्थाबाट गुज्रिरहेको कारण नेताहरूले राजसंस्थाको पुनस्र्थापनाका लागि वातावरण बनाइ दिन आफूलाई आग्रह गरेको बताएका हुन् । 

थापाका अनुसार, भदौ २४ गते राति १२ बजेका आसपास ती नेताहरूले आफूसँग समन्वय गर्दै “अब देश बचाउन राजालाई ल्याउनुको विकल्प छैन” भन्ने धारणा व्यक्त गरेका थिए । नेताहरूले मुलुकको अवस्था निकै खराब रहेको र सिमामा विदेशी सेनाहरू समेत आएर बसेकाले अबको विकल्प राजा नै भएकाले त्यसका लागि राजनीतिक वातावरण बनाइदिन आफूहरूले पनि सहयोग गर्न तयार रहेको नेताहरूले बताएको अध्यक्ष थापाको दाबी थियो । 
हालको राजनीतिक संकट समाधानका लागि सबै राजनीतिक शक्तिहरूले आपसी समझदारीका साथ देशको स्थायित्व र राष्ट्रिय एकतालाई प्राथमिकता दिनुपर्नेमा अध्यक्ष थापाले जोड दिए ।